-ઉર્વીશ વસાવડા - મને ગમતી પ્રત્યેક ક્ષણ ગઝલમાં લઈને આવ્યો છું

મને ગમતી પ્રત્યેક ક્ષણ ગઝલમાં લઈને આવ્યો છું

ઘણી વાતો તમારી પણ ગઝલમાં લઈને આવ્યો છું

સતત ચાહી છે કુદરતને પૂરી નિષ્ઠાથી જીવનમાં

નદી, પર્વત ને તપતું રણ ગઝલમાં લઈને આવ્યો છું

શિલાલેખો, ગિરિ ગિરનાર, દામોકુંડ, કેદારો

જૂનાગઢની ધરાના કણ ગઝલમાં લઈને આવ્યો છું

સમજપૂર્વક હકીકતને જુદી, આભાસથી પાડી

અરીસામાં પ્રગટતો જણ ગઝલમાં લઈને આવ્યો છું

નથી મારી ખૂબી એમાં, લખાવે છે કૃપા એની

સતત એ વાતની સમજણ ગઝલમાં લઈને આવ્યો છું

-ઉર્વીશ વસાવડા